2009 ... "Atharrachadh"

B’ fheudar gu bheil sibh a’ saoilsinn carson a bhiodh duine sam bith dòchasach mu 2009, ach thà mise. Tha mi dòchasach air sàillibh gu bheil an saoghal ag atharrachadh, agus tha e a’ dèanamh sin air sàillibh gu bheil a’ mhòr shluaigh ge b’ e cò às a tha iad, seachd searbh sgìth le gnothaichean mar a tha iad. Tha Obama air an fheallsanachd “atharrachadh” a ghairm iomadach tursan, agus tha e ceart. Bidh an saoghal ag atharrachadh ann an 2009.

A’ tòiseachadh leis an suidheachadh anns an Ear Mheadhan – chan ann a-mhàin ann an Gaza, ach air feadh na sgìre – ann an Iraq cuideachd. Bidh Bush a-mach às an dealbh. Tha Blair a-mach às an dealbh a thaobh poileasaidh Breatannach thall thairis. Tha Hamas a-nis lag. Tha e a’ coimhead gu bheil co-dhiù comas ann gum bi Kadima a’ buanachadh an taghadh nàiseanta ann an Israel seach Likud a tha nas fhaide air an taobh deas. Bidh taghadh nàiseanta ann an Iran sa Chèitean cuideachd. Tha comas ann gum bi na Libearalaich san dùthaich sin a’ buanachadh agus gum bi Ahmadinejad a-mach às an dealbh. B’ fheudar gum bi sin uile a’ tachairt ann an co-theacs far a bheil Obama a’ toirt dòchas ùr do ar ginealach-sa.

Tha Amaireaga agus Iran cha mhòr deiseil airson bruidhinn ri chèile, rud nach do thachair bho nuair a ghabh na h-Iranianaich thairis air an ambasaid Amaireaganach. Tha am BBC aig an dearbh uair a’ toiseachadh ri craoladh ann am Farsi air an telebhisean – rud a nì diofar mòr air sàillibh gu bheil an saoghal a-muigh ag èisteachd ris a’ BhBC agus bidh luchd-labhairt Farsi (a tha a’ fuireach ann an Iran, Afghanistan agus Tajikistan) a’ gabhail ùidh ann.

Tha sinn beò ann an saoghal aig àm nar n-eachdraidh far a bheil gach ceàrnag diofraichte den t-saoghal deiseil airson tighinn còmhla ann an inntinn; Amaireaga, an Roinn-Eòrpa, an Ruis, an Saoghal Arabach, Israel agus Iran. Tha na daoine cumanta anns na Roinntean seo sgìth de chùisean mar a bhà tro na bliadhnaichean goirid mu dheireadh, agus tha iad uile, tha sinn uile deiseil airson an dòchas sin a tha Obama a’ gairm – atharrachadh.